فاضل إيه

فاضل إيه

قصة قصيرة

خلي بالك من صحتك ومن نفسك .. ورنلي كل شوية طمني عليك .. والله ما عايزاك تسافر وأنت تعبان كده

فرردت : معلش أنا دلوقتي أحسن

نظرت خالتي لأخي واستدركت
خلي بالك من أخوك يا وليد وخليك معاه علطول

وبعد أن ودعنا الجميع .. نزلت أنا وهو إلى المحطة لنركب .. ولم نجد سيارات ال (7 راكب ) التي اعتدنا عليها .. فركبنا ميكروباص واضطررت أن أترك حقيبتي مرغما للسائق ليضعها فوق شبكة الميكروباص .. فليس هناك مكان بالسيارة لتبقي معنا .. وجلست بجوار الشباك ووليد بجواري .. وتحركت السيارة والقلق يأكل فيما تبقى من جسدي
ونظر إلي قائلا

مالك .. أنت تعبان .. حاسس بحاجة

فأجبت : مفيش

إزاي أنت مش على بعضك .. ومش عارف تاخد نفسك كويس .. وعينيك بتروح وتيجي وعمال تفرك في ايديك من ساعة ما ركبنا .. لو دايخ قول .. ننزل هنا نشوف دكتور

مفيش بجد

نظر إلي قليلا وكمن تذكر شيئا فجأة فصاح قائلا ببعض من الغضب

أنت لسه بتفكر فيها .. يا أخي إنسى بقى

لم أرد وظل يحاصرني بكلامه .. وكم من العلاقات انتهت هكذا ولم يمت أصحابها .. ولم يفعلوا مثلما فعلت أنا .. وأنا لا أفكر في كل كلامه هذا وأذهب بخيالي بعيدا عنه ولا أرد

مالك .. أنت مكنتش كده .. أنت مش معايا حتي

أجيبه : خايف كل اللي بينا يضيع

مستغربا وبإنفعال يرد
هيضيع ايه أكتر من اللي ضاع .. ما انتوا خلاص سبتوا بعض .. يا ابني فوق بقي دي اتجوزت خلاص وسافرت .. ولا كأنك كنت في حياتها يوم من الأيام .. اللي زيها ميستحقش منك دمعة حتى ..وأنت .. أنت بقى اللي مش راحم نفسك بقالك شهرين سايب الشغل وسايب الدنيا كلها وبتلف من بلد لبلد قال يعني بتزور قرايبك وبتغير جو .. لكن طلع أنك بتتعب في نفسك وعايز تدمر صحتك
يصمت لحظات ويستدرك قائلا
اتدمرت خلاص .. قولي ايه فاضل بقى عشان يضيع

وتعالت في نفس اللحظة أصوات الركاب
حاسب يا أسطه

وحصل الاصطدام ودارت السيارة حول نفسها مرتين أو ثلاث وشج الزجاج رأسي .. والدم ينساب منه .. ورأيتها تقع على الأرض فقلت له مشيرا إليها : الشنطة .. الشنطة

مالها .. يا ابني احنا في ولا ايه .. أنت بتموت .. الحقوني يا ناس

فيها كل ورقها وكل كلمة كتبتهالي وكل حاجة وعدتني بيها قبل كده وفيها اخر صورة ليها .. هو ده اللي فاضل